Служба святителю Митрофану Воронежскому

Молитвы:

Святителю отче Митрофане, нетлением честных мощей твоих, и многими благодеяньми, чудесно содеянными и содеваемыми тобою, с верою к тебе притекающим, уверившеся, яко имаши велию благодать у Господа Бога нашего, всесмиренно припадаем вси, и молимся тебе: моли о нас Христа Бога нашего, да низпослет всем чтущим святую память твою, и усердно к тебе притекающим, богатыя милости Своя; да утвердит во святей Своей Православней Церкви живый дух правыя веры и благочестия, дух ведения и любве, дух мира и радости о Дусе Святе, да вси члены ея, чисты от мирских искушений и плотских похотей, и злаго действия злых духов, духом и истиною покланяются Ему, и усердно пекутся о соблюдении заповедей Его, ко спасению душ своих. Пастырем ея да даст святую ревность попечения о спасении людей, им вверенных, да неверующих просветят, неведущих наставят, сомневающихся вразумят и удостоверят, отпадших от Православныя Церкве обратят во святыя недра ея, верующих соблюдут в вере, грешных подвигнут к покаянию, кающихся утешат и укрепят в исправлении жизни, раскаявшихся и исправившихся утвердят в святости жизни, и тако всех введут указанным от Него путем в уготованное вечное Царство святых Его. Всем людем да дарует мир, тишину, безмятежие, усердие в исполнении заповедей Его, установлений святыя Церкве и закона гражданскаго, и изобилие в потребнем для жизни сея; и избавит град сей, и вся иныя грады страны нашея и веси от глада, труса, потопа, огня, меча, нашествия иноплеменных, междоусобныя брани, смертоносныя язвы и от всякаго зла. Ей, святителю Божий, да устроиши молитвами твоими вся благая душам и телесем нашим, да и мы прославим в душах и телесех наших Господа и Бога нашего, Иисуса Христа, Емуже со Отцем и Святым Духом слава и держава, во веки веков. Аминь.

 

Тканая хоругвь из храма Святителя Митрофана Воронежского. Москва.

 

О всехвальный святителю Христов и чудотворче Митрофане, приими сие малое моление от нас грешных, к тебе прибегающих, и теплым твоим предстательством умоли Господа и Бога нашего, Иисуса Христа, яко да призрев на ны милостивно дарует нам согрешений наших вольных и невольных прощение, и по велицей Своей милости избавит нас от бед, печалей, скорбей и болезней душевных и телесных, обдержащих нас; да подаст земли плодоносие, и вся яже на пользу настоящаго жития нашего потребная. Да дарует нам скончати житие сие привременное в покаянии, и да сподобит нас грешных и недостойных Небеснаго Царствия Своего, со всеми святыми славити Его безконечное милосердие, со Безначальным Его Отцем, и Святым и Животворящим Его Духом, во веки веков. Аминь.

 

Шитая бисером икона святителя Митрофана Воронежского. 
Храм Святителя Митрофана Воронежского. Москва.