КАНОН СВЯТОМУ МУЧЕНИКУ УАРУ

КАНОН
СВЯТОМУ МУЧЕНИКУ УАРУ

емуже дана бысть благодать умолити
за умершия Клеопатрины прародители,
не сподобльшияся прияти
святаго крещения
 [1]

Песнь 1

Ирмос:  [2] Колесницегонителя фараоня погрузи, чудотворяй иногда, Моисейский жезл крестообразно поразив и разделив море, Израиля же беглеца пешеходца спасе, песнь Богови воспевающа.

Припев: [3] Святый мучениче Уаре, моли Бога о нас.

Умолен буди, Господи, святым Твоим Уаром мучеником и облецися в милость и щедроты; и сия даже до ада излиются, Человеколюбче, и ущедрят, яже от нас просимыя [4], богатным Твоим милосердием.

Мучениче Христов великий, озлобленныя и безпомощныя воспомяни, седящия во мраце тьмы не просветимыя, и не престани, припадая ко щедрому Господу, дондеже утешит я богатным Своим милосердием.

Слава: [5] О роде Клеопатры дивныя умолити возмогл еси, славный страстотерпче, убо и днесь, возмогая, возможеши свободити от мук, иже от нас воспоминаемыя, аще прилежно о них ко Господу помолишися, тебе бо ради утешит я Владыка богатным Своим милосердием.

И ныне: [6] Безпомощным Благая Помощнице, призри от славы Своея, Владычице, ко мраку адову и виждь беды умиленных, пред Тобою нами воспоминаемых, и не престани о них умоляя Своего Сына и щедраго Господа и Владыку, дондеже утешит я богатным Своим милосердием.

Песнь 3

Ирмос:  Утверждей в начале Небеса разумом и землю на водах основавый, на камени мя, Христе, заповедей Твоих утверди, яко несть свят, паче Тебе, Едине Человеколюбче.

Лик святых Сил Небесных подвигни с собою на молитву, мучениче, и сотвори дело пречудно, и велико, и честно, паче же радость неимущим надежды и утешения не уповающим, горьким нашим неверно умершим прародителем и еже с ними воспоминаемым, еже даровати сим от Господа прощение и велию милость.

Изрядный страстотерпче и Христу любимый, увеждь, коль желательна свобода мучимым и отрада, сице убо и наша сродники, и иже с ними неверия ради вечныя муки притяжавшия, меры не обрящут своим радостем, аще испросиши сим от Господа прощение и велию милость.

Слава: Уаре, добропобедный страдальче, милостив буди и к нашим молением, и зри удрученных несказанную нужду, и сам, от жалости понужден, неотступно молися к Человеколюбцу Владыце, да подаст им прощение и велию милость.

И ныне: Всемирная надеждо, богоприятное селение, наше к Богу примирение, Марие Владычице, приими прошения настоящаго предстояния и не престани моляся к Сыну Своему и всяческих Господу, да подаст безнадежным Тебе ради прощение и велию милость.

Седален, глас 5

Аще молишися за весь мир, великомучениче, и не престаеши, прося всем милости и всяким преступником всеми образы люто Владыце досадившим и непрестанно досаждающим, иже мертвыми делы себе до конца умертвившим и ничтоже приобретшим, яко зло сотворшим, такоже, страстотерпче, предстани и о наших умерших сродницех, яко возможная начиная, не отступи, моляся и припадая к милующему всех Господу, да простит и помилует, иже во тьме седящия и люте зело огорченныя.

Другий седален, глас 3

Радости вечныя насельниче, Небесному покою тезоименитый, Уаре великий, дерзая, да дерзнеши воспомянути пред Господем умиленныя четы наших прародителей, аще бо и не в гробе оных полагаем тя, усердным же прошением к жалости, еже от них, совокупляем тя. Темже припади и молися, не отринет бо предстояния твоего Владыка, но от безмерныя благостыни преклонен, пошлет преогорченным избавление и велию милость.

Слава: И ныне:

Пресветлая Госпоже, от Небесных сил превоспеваемая, и выну возвеличаемая, Мати Царя всяческих, где убо и когда хощет умножитися Твоя слава и величество, не тогда ли, егда грешныя заступаеши и весь мир молитвами Своими покрываеши, темже и днесь умножи, Владычице, велелепоту Твоего превозхождения, избави теплыми Твоими молитвами от лютых мук неверныя наша и некрещенныя сродники и с яже о них и с ними воспоминаемыя, и подаждь оным избавление и велию милость.

Песнь 4

Ирмос:  Ты моя крепость, Господи, Ты моя и сила, Ты мой Бог, Ты мое радование, не оставль недра Отча, и нашу нищету посетив, тем с пророком Аввакумом зову ти: силе Твоей слава, Человеколюбче.

Ельма убо [7], страстотерпче, всех любиши с верою к тебе прибегающих, темже и любимь быти от молящих тя благопоспеши. Что же ино с желанием прославити тя Человеколюбный сотворит, не поданием ли просимыя милости умиленным и всяния отрады лишенным вечным узником, тако и впредь, о доблий мучениче, не оскудей о сих моляся.

Зима люта и спасения безплодие облежит в нечестиих умершия и плач безотраден, зде убо вочтени [8] суть, иже от нас воспоминаемыя. Ты же, страстотерпче, соединити сих к роду праведных потщися и не оскудей о них моляся.

Слава: Адова мрачная темница во веки да не обымет прародители и сродники наша и вся, воспоминаемыя с ними: тебе, дивному страдальцу, силу неверия и греховную мощь низложившу, тако и впредь сих еже с Клеопатриным родом простити не оскудей, мучениче, моляся.

И ныне: Тобою, Пречистая, познахом славити всяческих Содетеля, и от Тебе Плотоносца непрелестна Спаса величати навыкохом, и Тя, Владычицу, хвалим, и Тебе поклоняемся, и молим, помилуй умершия в неверии наша сродники, и еже избавити сих не оскудей к Сыну моляся.

Песнь 5

Ирмос:  Вскую мя отринул еси от лица Твоего, Свете незаходимый, и покрыла мя есть чуждая тьма, окаяннаго, но обрати мя и к свету заповедей Твоих пути моя направи, молюся.

Всяко дарование, мучениче, и всяка милость от милостиваго Господа изливаемы, аще и предивны, и пречудесны суть, слагаеми же к прощению в нечестии умерших, величество преизящно сему оставляют. Темже и днесь великая сотворити потщися, Владыку, мучениче, умолити.

Не отвратися, Господи, от нашего умиления, ниже помяни множество грехов наших, паче же помяни древния Своя милости, и ради щедрот Твоих, и ради Уара страдальца добляго, не оскудей в богатстве безмернаго Твоего милосердия, но излей милости и прощение, еже от нас воспоминаемым.

Слава: Есть убо, великомучениче, и достизает человеколюбие Владычне и к сущим в мори далече, темже предстани и днесь и, припадая, умоли Его еже помиловати удаленныя и веры, и Крещения отчужденныя умершия наша сродники и всем, иже с ними воспоминаемым, даровати прощение и велию милость.

И ныне: Предстани, Владычице, нашему изнеможению и буди выну в нуждах, помогая нам всюду и присно, Ты бо еси христианская Надежда и Упование, темже не отрини наша прошения, но сотвори совершена и исполнена неисписанною Твоею благодатию.

Песнь 6

Ирмос:  Очисти мя, Спасе, многа бо беззакония моя, и из глубины зол возведи, молюся: к Тебе бо возопих, и услыши мя, Боже спасения моего.

Шатания вражия да не возрадуются, души в корысть получивши, ты же, мучениче, теплыми своими молитвами разруши хотения его, умоляя Господа еже простити нами воспоминаемыя и от вечныя муки тоя и нас избавити.

Начало нашему подвигу Клеопатрина рода прощение, отсюду убо виновное восприяхом возставити тя на молитву, и о еже нами поминаемых не презри, великомучениче, и не отрини грешных предстояние, но, потщався, испроси у Владыки Христа оным прощение и от горьких мук избавление.

Слава: Иже неверия ради срете конец зол, и чаяние благих весьма погибе прогневания Божия ради, ты же, страстотерпче, дерзновение прием, радость отпущения вместо страшнаго томления от Небеснаго Царя испроси и, извед от горести, соблюди во Владычней милости.

И ныне: Кая, Владычице, злоба превозможет Твоя матерния молитвы?

Воистину убо, аще предстанеши и днесь, моля за просимыя Тобою, сотвориши оным радостное прощение, избавление и велию милость.

Кондак, глас 4

Христу последуя, мучениче Уаре, Того испив чашу, и венцем мучения увязеся, и со Ангелы ликовствуеши, моли непрестанно за души наша.

Икос

Воспомяни наша глаголы, светлый жителю Небесный, Христов славный великомучениче Уаре, вечному покою тезоименитый, и великими твоими страдании непроходимое и светлое покоище приобретый от непреходныя темницы, и томления непрестаннаго, и нужды, потщися богоприятными твоими молитвами избавити рабы умиленныя, ихже ради молим тя, предстояще и во усердии взывающе, исполни наша прошения, святе, и Христа Бога моли непрестанно за души наша.

Песнь 7

Ирмос:  Божия снизхождения огнь устыдеся в Вавилоне иногда, сего ради отроцы в пещи радованною ногою, яко во цветнице, ликующе, пояху: благословен еси, Боже отец наших.

Яко же солнце, Господи, всех просвещаеши, и всем дождь независтно изливаеши, и прогневающим Тя милость непрестанно даруеши, и ныне послушай Уара, Твоего страдальца, и пролей милость Твою до конца оныя отчужденным сродником нашим и яже с ними неверным, Человеколюбче.

Ныне, якоже и прежде, щедр буди, Господи, и умолен явися, Владыко, якоже о Клеопатре содея, сице и о нас, Милостиве, сотвори; посли Своя щедроты и милосердие ко еже нами воспоминаемым, источник бо еси милости неисчерпаемый.

Слава: Аще пророк, восперяяся, поет милости Твоя, Господи, во веки, убо не оскудевша Тя в щедротах веруем, яко милосердия Твоего пределы неизмеримы, и от пучины во глубину потопшим излияти милости Тя умоляем, исполни убо ради мученика сие, о Владыко наш.

И ныне: Гору Тя сказует премудрый во пророцех, мы же тому и еже от Тебе Каменю Богородия изыти без примешения мужеска, веруем; Имже наше спасение и от глубин адовых возведение получихом, Владычице, возведи и днесь от ада воспоминаемыя нами, да Тя, Всемилостивую, непрестанно величаем.

Песнь 8

Ирмос:  Мусикийским органом согласующим и людем безчисленным поклоняющимся образу в Деире, три отроцы не повинувшеся, Господа воспеваху и славословяху во вся веки.

Шары [9] да будут словеса древния Твоя, милости, Господи, сказующия и нашу надежду воздвижущия, яко послушал еси святыя Твоя, Господи, еже помиловати неверныя умершия, ихже и днесь приводим Ти на молитву, да прошения их ради ущедриши инославно умершия, ведением и неведением Тебе, Владыко, досадившия.

Агнче Божий, Пречистою Своею Кровию нас искупивый, Феклино и блаженнаго Григория моление услышав, Мефодия со многими и Макария прием прошения, и отраду, и избаву зловерным подав умершим, и Златоустаго о сих молитися написати воздвигнув, приими убо, Владыко, с сими славнаго Уара и молитвами их воспоминаемыя от нас прости и помилуй.

Слава: Радость нам испроси, великомучениче, возвеселимся бо, аще обрящем твоими молитвами избавленныя от вечных мук наша сродники; всегда бо твоя молитвы Владыка слышит и прошения исполняет, ты же убо не оскудей о сих и ныне моляся, да тя выну прославляем.

И ныне: Пренепорочная Владычице, обилуй множеством милосердия и щедрот, дивная и Безневестная Мати Царева, нам бо милости взыскающим, где инде сию обрящем, аще не к Тебе поспешим, припадающе, Ты бо Поток сладости преизобилен нам родила еси, Преблагословенная.

Песнь 9

Ирмос:  Ужасеся о сем Небо, и земли удивишася концы, яко Бог явися человеком плотски, и чрево Твое бысть пространнейшее Небес, тем Тя, Богородицу, Ангелов и человек чиноначалия величают.

О Бозе да возможеши, Уаре славный, богоприятными твоими молитвами восприяти и излияти милости, иже до конца оныя отчужденным, Един бо есть щедрот и милосердия Родитель, и вся Ему возможна яко Владыце, к Немуже неотступно, страдальче, молися простити и помиловати яже от нас воспоминаемыя.

Дело соверши предивно, о великомучениче, и славе твоей прикладно, еже от Господа прощение и праведнаго Его гнева пременение испросити огорченным темнаго зловерия ради нашим прародителем и еже сих, в горести и во ожидании лютейших сущих, да возмеши в безстрашное избавление, идеже веси Владыка прощенныя положити.

Слава: И кое убо чудо явится сего дивнейши, кая слава знаменитейши, и кое милосердие таковаго больши, аще ты, мучениче, сожалев, умолиши милостиваго Господа отпустити грех нечестия, иже от нас поминаемых, и лютаго томления оных избавити.

И ныне: Владычице милостивая, человеколюбивая и зло не помнящая, приими жалость нашего прошения и ходатайствуй неотступно о милости к милостивому Твоему Сыну и Владыце, еже помиловати и простити грех инославия умершим сродником нашим и яже с ними помянутым, отпущение и место сим милости неотъемлемо подати.

Светилен

Праведно убо да будет, Владыко Господи, простившему Ти Клеопатрины прародители, и днесь услышати молитву Уара Твоего великомученика и на>ше, многогрешных, предстояние: от мук избавити, иже с жалостию пред Тобою воспоминаемыя. Темже ускори, Щедрый, и потщися яко милостив помиловати сих, яко можеши, хотяй.

Слава: И ныне:

Потщися, Владычице, услышати нашу молитву, яже в Твоей Церкви к Тебе приносимую, и Сама, Богородительнице, преклони на милость Сына Своего и Владыку еже помиловати и от праведнаго гнева разрешити умершия прародители, други же и сродники наша, ускори убо, Всемилостивая, избавити сих, можеши бо яко милостива, хотящая всем милости.



[1] Канон 8-го гласа.

[2] Напечатанное курсивом во время молитвы не читается.

[3] Этот припев произносится перед всеми тропарями канона кроме тропарей, начинающихся со слов «Слава» и «И ныне».

[4] В данном месте в издании канона мученику Уару Православного Свято-Тихоновского гуманитарного университета и в других изданиях добавлено слово «(имена)» для перечисления имен усопших. Это слово добавлено практически во всех тропарях канона в соответствующих по смыслу местах. Однако издатели данной брошюры придерживаются текста Минеи.

[5] Надо читать: Слава Отцу и Сыну и Святому Духу.

[6] Надо читать: И ныне и присно и во веки веков. Аминь.

[7] Ельма убо — так как.

[8] Вочтени - причтены, причислены.

[9] Шары - явны.