КАНОН СВЯТОМУ МУЧЕНИКУ УАРУ

МОЛИТВЫ ИЗ СЛУЖБЫ
СВЯТОМУ МУЧЕНИКУ УАРУ

Стихира на стиховне, глас 6

Приими жалость нашу, мучениче, да помянеши во тьме и сени смертней седящия осужденныя, яже от нас сродники, и Господа Бога да умолиши исполнити о них наша прошения.

Стихира на «Господи, воззвах», глас 8

Славный великомучениче Уаре чудный, во страданиих совершивыйся и явися светел победник, побеждая врага велехвальнаго [1], мученьми стерл еси главу его, и кровей своих течением того удавил еси, и ныне на Небесех в дерзновении мнозе Святей Троице предстоиши. Темже убо в величестве твоего веселия воспомяни, иже в горести мнозей сущия, умиленныя [2] и омраченныя, праведным судом Владычним осужденныя, во тьме и сени смертней седящия и лютым пременения не уповающия. Услыши оных стонания и вопления, иже «увы нам!» и «горе!» восклицаемыя, иже своя недоумения и грубости весьма оплакавшия, наша прародители и сродники и яже окрест их сущия, веры и Крещения святаго православно не достигшия, но тако в недоумениих, яко и в прекословиих, обольщенныя и всеразлично падшия. Услыши, великомучениче, настоящия вопления и умоли дати утесненным оным прощение, и отпущение, и от скорбных избавление: не оскуде бо милость Владычня, но, якоже древле, сице и ныне, слышит твоя прошения и дарует богатно велию милость.

Стихира на литии, глас 8

Да не оскудеет, мучениче, великодаровитая благодать твоя, да не забудети древняго промысла, и еже за неправославных умоление, умерших уже многолетне, ихже тебе ради свободи Господь от лютых и прегорьких томлений. Прочее и ныне прилежно помолися, мучениче, от затвор адских избавити и от горести свободити непреходныя, иже умрети нас предварившия, родом, и любовию, и враждою, и всячески присвоения спасительнаго же порождения не приемшия и Православныя веры отчужденныя, ускори убо еже испросити оным от Христа Бога прощение, и отпущение, и велию милость.

Стихира по 50-м псалме, глас 6

Приидите, мучениколюбцы, страстотерпца восхвалим и песненными гласы, торжествующе, возопием: радуйся, чудный великомучениче, преславный Царя Христа венечниче и воине доблий и непобедимый, сопостата врага храбро победивый, ты днесь венцы Небесныя и почести восприял еси от Подвигоположника Владыки, к Немуже предстани, моляся избавити наша неверныя сродники и прародители и всех, о нихже молимся, от лютаго и горькаго томления и свободити от мрачных уз адовых, уже бо раскаяшася о злобах своего тяжкосердия и лености, отнюдуже унывше и ум в земных погребше, ко истинному Свету не достигоша, и, плоды своего нерадения поженше, вечную пагубу приобретоша, и неправды своя мраком непреходнаго томления видят, угнетаемы. Преклонися, мучениче дивный, и преклони на милость Преклонившаго Небеса и спасти грешныя сошедша, да твоими молитвами подвижен, милость излиет до конца оныя лишенным и не чающим ни откуду же отрады, юже, твоими молитвами получивше, неизмерным возрадованием облекутся и, возвеселившеся несказанно, возопиют Христу Богу: велия Твоя милость, Владыко, и неоскудны Твоя щедроты, яко всем подаеши богатно велию милость.

Стихира на хвалитех, глас 2

Святый мучениче Уаре великий, зря Христовы страдальцы, ранами тяжкими обложенныя, ревностию по Владыце разжигаемь, Небеснаго Царя пред мучителем исповедал еси, и о Нем усердно пострадал еси, и с Ним ныне царствуеши, Егоже моли послати милость умершим в неверии и спастися душам нашим.

Слава: И ныне:

Вогородичен: Прекрасная Слову палато, вожделенная Царская ложнице, одушевленный Христов чертоже, Непорочная Невесто Отча, Марие, Пречистая Девице, призри ко умиленным нашим прошением и виждь, яко бедствуем от жалости, зряще страждущих лютая наших прародителей и ближников, аще бо и по достоинству, но премногое выну сретают томления, и скорбь, и мучение; призри убо, Всемилостивая, на сих от высот Своея радости, и лютыми оных нуждами подвигнися, и не престани от прошения, Владычице, дондеже умолиши Своего Сына и Господа подати безпомощным прощение и велию милость.

Молитва святому Уару

О, святый мучениче Уаре досточудный! Ревностию по Владыце Христу разжигаем, Небеснаго Царя пред мучителем исповедал еси, и о Нем усердно пострадал еси, и ныне Церковь почитает тя, яко прославляемаго от Владыки Христа славою Небесною, Иже дарова тебе благодать великаго к Нему дерзновения, и ныне предстоиши Ему со Ангелы, и в Вышних ликуеши, и зриши ясно Святую Троицу, и светом Безначальнаго Сияния наслаждаешися. Воспомяни и наших сродников томление, умерших в нечестии, приими наше прошение, и якоже Клеопатрин род неверный молитвами твоими от вечных мук свободил еси, тако воспомяни елицы противобожне погребенныя, умершия некрещенными, потщися испросити оным от вечныя тьмы избавление, да вси едиными усты и единем сердцем восхвалим Премилосердаго Творца во веки веков. Аминь.

Тропарь, глас 4

Воинством святых страстотерпец страждущих законне, зря онех, показал еси мужески крепость свою, и устремився на страсть волею, и умрети вожделе за Христа, Иже приял еси почесть победы твоего страдания, Уаре, моли спастися душам нашим.

Кондак, глас 4

Христу последуя, мучениче Уаре, Того испив чашу, и венцем мучения увязеся, и со Ангелы ликовствуеши, моли непрестанно за души наша.

Величание

Величаем тя, страстотерпче святый Уаре, и чтим честная страдания твоя, яже за Христа претерпел еси.



[1] Велехвальнаго - самохвального, превозносящегося.

[2] Умиленныя - горестные, сокрушенные.